ក. ក្រុមប្រឹក្សាភិបាល
សមាគមនិស្សិតខ្មែរប្រចាំសហព័ន្ធរុស្ស៊ីមានក្រុមប្រឹក្សាភិបាល ជាស្ថាប័នសម្រាប់ត្រួតពិនិត្យមើលរាល់សកម្មភាព និងដំណើរការប្រព្រឹត្តិទៅនៃសមាគមនិស្សិត។
ក្រុមប្រឹក្សាភិបាល មានតួនាទីត្រួតពិនិត្យជាប្រចាំនូវសកម្មភាពការងាររបស់ប្រធាន និងអនុប្រធានសមាគម។
ក្រុមប្រឹក្សាភិបាល មានចំនួនសមាជិកប្រែប្រួលទៅតាមស្ថានភាពជាក់ស្តែង ដែលជាចំនួននេះជាចំនួនសេស (៣ ៥ ៧....) និង កើតចេញពីការបោះឆ្នោតជ្រើសរើសរៀងរាល់ ១ ឆ្នាំម្តង។
ក្រុមប្រឹក្សាភិបាល មានតួនាទីក្នុងការធ្វើសេចក្តីសម្រេចផ្សេងៗទាក់ទងនឹងបញ្ហាហិរញ្ញវត្ថុ និងបញ្ហាសំខាន់ផ្សេងទៀត។
ខ. ប្រធានសមាគម
ប្រធានសមាគមនិស្សិតខ្មែរប្រចាំសហព័ន្ធរុស្ស៊ីកើតចេញពីការបោះឆ្នោតជ្រើសរើសដោយសមាជិក សមាគមនិស្សិតខ្មែរប្រចាំសហព័ន្ធរុស្ស៊ី រៀងរាល់ ២ ឆ្នាំម្តង។
ប្រធានសមាគមនិស្សិតតំណាងឲ្យនិស្សិត សមណៈនិស្សិត និងសិក្ខាកាមយោធាកម្ពុជាទាំងអស់ដែលកំពុងសិក្សានៅសហព័ន្ធរុស្ស៊ី។
ប្រធានសមាគមនិស្សិតមិនអាចយកតួនាទីនេះធ្វើសកម្មភាពនយោបាយណាមួយបាននោះទេ។
ប្រធានសមាគមនិស្សិតជាតួអង្គដ៏ចំបងក្នុងសកម្មភាពការងាររដ្ឋបាល ទំនាក់ទំនង និងជាតួអង្គមិនអាចខ្វះបានក្នុងការដោះស្រាយរាល់បញ្ហានានាដែលនិស្សិត សមណៈនិស្សិត និងសិក្ខាកាមយោធាកម្ពុជា បានជួបប្រទះ។
គ. អនុប្រធានសមាគមនិស្សិត
អនុប្រធានសមាគមនិស្សិតខ្មែរ ប្រចាំសហព័ន្ធរុស្ស៊ីមាន អនុប្រធានទទួលបន្ទុកផ្នែកសិក្ខាកាមយោធា អនុប្រធានទទួលបន្ទុកផ្នែកនិស្សិតស៊ីវិល និងអនុប្រធានទទួលបន្ទុកប្រចាំការនៅកម្ពុជា។ ចំនួនអនុប្រធាន អាស្រ័យលើស្ថានភាពចាំបាច់ជាក់ស្តែងរបស់សមាគមនិស្សិត។
អនុប្រធានសមាគមនិស្សិតទទួលបន្ទុកផ្នែកនិស្សិតស៊ីវិលត្រូវជ្រើសតាំងដោយប្រធានសមាគមនិស្សិតក្នុងអាណត្តិ និងត្រូវសុំសេចក្តីទុកចិត្តពីក្រុមប្រឹក្សាភិបាល។
អនុប្រធានសមាគមមានតួនាទីជាអ្នកជួយសម្រួល និងជំនួសការងាររបស់ប្រធានសមាគម។
អនុប្រធានសមាគមនិស្សិតទទួលបន្ទុកផ្នែកសិក្ខាកាមយោធាកើតឡើងដោយការតែងតាំង ដោយអនុព័ន្ធយោធាកម្ពុជាប្រចាំសហព័ន្ធរុស្ស៊ី។
អនុប្រធានសមាគមមានអាណត្តិ ២ឆ្នាំទៅតាមអាណត្តិរបស់ប្រធានសមាគម។
អនុប្រធានសមាគមនិស្សិតមាន អនុប្រធានសមាគមនិស្សិតទទួលបន្ទុកផ្នែកសិក្ខាកាមយោធា អនុប្រធានទទួលបន្ទុកផ្នែកនិស្សិតស៊ីវិល អនុប្រធានទទួលបន្ទុកប្រចាំការនៅកម្ពុជា។
ឃ. ក្រុមនិស្សិតតាមបណ្តាទីក្រុង
ក្រុមនិសិ្សតខ្មែរតាមបណ្តាទីក្រុងនីមួយៗត្រូវតែចំណុះឲ្យសមាគមនិស្សិតខ្មែរប្រចាំសហព័ន្ធរុស្ស៊ី។
ក្រុមនិសិ្សតខ្មែរតាមបណ្តាទីក្រុងនីមួយៗអាចមាន រចនាសម្ព័ន្ធគ្រប់គ្រង ទ្រព្យសម្បត្តិផ្សេងៗ និងស្វ័យភាពហិរញ្ញវត្ថុដោយខ្លួនឯង។
ង. សមាជិក សមាជិកាសមាគមនិស្សិត
សិស្ស និស្សិត និងសិក្ខាកាមយោធា ដែលមានសញ្ជាតិកម្ពុជា ឬជាជនជាតិខ្មែរ ហើយដែលកំពុងសិក្សា និងរស់នៅក្នុងសហព័ន្ធរុស្ស៊ី មានសិទ្ធជាសមាជិក សមាគមនិស្សិត។
សិស្ស និសិ្សត និងសិក្ខាកាមយោធាកម្ពុជា ដែលមកសិក្សានៅសហព័ន្ធរុស្ស៊ី ទោះក្នុងរយៈពេលវែង ឬខ្លី ជាសមាជិក សមាជិកានៃសមាគមនិស្សិត ដោយអនុលោមតាមមាត្រា ១២ នៃលក្ខន្តិកៈសមាគមនិស្សិត។
លក្ខខណ្ឌនៃការបាត់បង់សមាជិកភាព៖
- ទទួលមរណភាព
- បានដាក់ពាក្យសុំលាឈប់ដោយផ្ទាល់ខ្លួនជាលាយលក្ខណ៍អក្សរជូន ក្រុមប្រឹក្សាភិបាល ឬប្រធាន អនុប្រធានសមាគមនិស្សិត ឲ្យបាន ០២(ពីរ)សប្តាហ៍មុនថ្ងៃឈប់ពីសមាជិកនៃសមាគមនិស្សិត
- មិនគោរពតាមលក្ខន្តិកៈ បទបញ្ជាផ្ទៃក្នុង និងសេចក្តីសម្រេចផ្សេងៗរបស់សមាគមនិស្សិត
- សមាជិក បញ្ចប់ការសិក្សាទាំងស្រុង ពីសហព័ន្ធរុស្ស៊ី
- មានជាប់ពិរុទ្ធផ្សេងៗ។
